ندم لم ينتهى حكاوي شيمو

هعمل المستحيل عشان نرجع أنا وإنتِ وولادنا أسرة من جديد.
بعد ما بعت الرسالة قعدت أبص للموبايل بالساعات.
كل دقيقة أفتح أشوف إذا كانت ردت ولا لأ.
كل إشعار يخضني.
كل رنة قلبى يدق معاها.
وفجأة…
ظهر إنها قريت الرسالة.
لكن مفيش رد.
عدى يوم.
واتنين.
وتلاتة.
وأخيرًا في ليلة متأخرة جدًا…
الموبايل رن.
ولما بصيت على الشاشة…
لقيت اسمها ظاهر قدامي.
يتبع…
كملت رنة التليفون وأنا إيدي بتترعش.
بصيت للشاشة أكتر من مرة عشان أتأكد إني مش بتخيل.
أسماء بتتصل…
رديت بسرعة وقلبي هيطلع من مكانه.
ألو…
سكتت شوية.
وبعدين قالت بصوت هادي
إزيك؟
أول ما سمعت صوتها حسيت إن السنين كلها رجعت مرة واحدة.
قولتلها
الحمد لله… إنتِ عاملة إيه؟
قالت
كويسة.
وسكتنا.
سكات طويل مليان كلام أكتر من أي حوار.
وبعدين قالت
قريت الرسالة.
قولتلها بسرعة
وأنا مستني ردك من يومها.
قالت
عارف أنا فضلت كام يوم بفكر قبل ما أكلمك؟
قد إيه؟
ثلاث ليالي ما نمتش.
ساعتها حسيت إن فيه أمل.
قلت
يعني لسه في فرصة؟
ضحكت ضحكة حزينة وقالت
إنت لسه زي ما أنت… عايز تسمع اللي يريحك بس.
اتوترت.
وقلت
أنا بحبك يا أسماء.
قالت
متأكد؟
أيوة.
ولا عشان اكتشفت إن الجوازة الجديدة مش زي ما كنت متخيل؟
الكلمة دي ضربتني في قلبي.
لأول مرة معرفتش أرد.
قالت
أنا مش بديل يا أحمد.
أنا عارف.
ومش محطة ترجع لها لما تتعب.
أنا غلطت.
غلطت لما سبتني… وغلطت أكتر لما اتجوزت قبل ما تتأكد إنك نسيت.
دموعي نزلت.
وقولت
أنا ندمان.
قالت
الندم مش دايمًا بيصلح اللي اتكسر.
ساعتها حسيت إن كل حاجة بتضيع من إيدي.
قلت بسرعة
يعني خلاص؟
سكتت شوية.
وبعدين قالت
بصراحة؟
قولي.
أنا سامحتك.
اتنفست براحة لأول مرة.
لكنها كملت
بس السماح حاجة… والرجوع حاجة تانية.
وقتها قلبي وقع.
قالت
بعد الطلاق أنا اتوجعت جدًا.
عارف.
لأ… إنت مش عارف.
وسكتت ثواني.
وبعدين قالت
إنت كنت عندك حياة جديدة تبدأها… وأنا كنت بلم نفسي من على الأرض.
مقدرتش أتكلم.
قالت
عارف أصعب حاجة كانت إيه؟
إيه؟
إني كنت مستنياك ترجع وقت ما كان لسه ينفع ترجع.
سكتنا.
قالت
لكن دلوقتي فيه ناس اتظلمت بسبب قرارك.
فهمت قصدها فورًا.
مراتي الجديدة.
البنت اللي ملهاش أي ذنب.
قالت
إنت دلوقتي مسؤول عن بيت وعن إنسانة وثقت فيك.
بس أنا مش سعيد.
وأنا كمان مكنتش سعيدة لما اتطلقت.
الكلمات كانت قاسية…
لكنها حقيقية.
قالت
السعادة مش إننا نهرب من أخطائنا.
أعمل إيه؟
قالت
صلح اللي تقدر تصلحه.
يعني إنتِ مش هترجعي؟
سكتت.
ثواني طويلة.
وبعدين قالت
لأ.
الكلمة كانت بسيطة.
لكنها كسرت حاجة جوايا.
قالت
أنا هفضل أم ولادك طول العمر.
…
وهفضل أدعيلك ربنا يصلح حالك.
…
بس إحنا صفحة واتقفلت.
وبعدين أضافت
ومتظلمش البنت اللي معاك… لأنها مش السبب في إنك لسه عايش في الماضي.
وقبل ما تقفل قالت آخر جملة
أحيانًا يا أحمد… أكبر عقاب للإنسان إنه يفهم قيمة الحاجة بعد ما يخسرها.
وقفلت الخط.
قعدت أبص للشاشة دقايق طويلة.
وأول مرة أفهم إن بعض الأبواب لما بتتقفل…
مبتتفتحش تاني.
قومت من مكاني.
بصيت حواليّا.
بصيت للبيت.
وبصيت للصورة اللي كانت مرمية قدامي.
ولأول مرة…
شيلتها وحطيتها في درج مقفول.
مش عشان نسيت.
لكن عشان فهمت إن الذكريات مينفعش تكون سجن لحد تاني.
وروحت لمراتي.
كانت قاعدة لوحدها في الصالة.
بصتلي باستغراب.
قولتلها
ممكن نتكلم؟
قالت
في إيه؟
قولتلها والدموع في عيني
في حاجات كتير غلط عملتها… ولازم أصلحها.
ومن يومها بدأت رحلة طويلة من الاعتذار وإصلاح اللي اتكسر.
يمكن عمري ما أنسى أسماء.
لكن اتعلمت
درس عمره ما هيفارقني
الحنين للماضي مش دليل حب دايمًا… ساعات بيكون مجرد ندم متأخر على حاجة ضيعناها بإيدينا..