حماتي وأخت جوزي أكلوا العشا٢
في الوقت ده، كانت ياسمين طالعة في الأسانسير لبيت أهلها بمدينة نصر.
فتحت أمها الباب، ولما شافتها شايالة الشنطة التقيلة، اتخضت على طول. أما أبوها، فقام من مكانه بهدوء، ومسك الشنطة من إيدها ودخلها الجوة.
قعدت ياسمين على الكنبة، ووشها كان فيه هدوء غريب. ما كانتش بتعيط، ولا بتصرخ، ولا زي ما كريم ونوال متوقعين.
قال أبوها ونبرة صوته مليانة حكمة ورزانة:
ـ كنت عارف إنك مش هترجعي دي النهاردة يا ياسمين.
نظرت له ياسمين وقالت:
ـ أنا مش هرجع الشقة دي تاني أبدًا يا بابا… إلا وأنا واخدة كل حق ليا بالكامل. كريم انتهى بالنسبة لي من المرة الأولى اللي مسك فيها دراعي وعلم عليه عشان أمه، ومن اللحظة اللي سمعته بيمهد معايا عشان يسرق شقاي.
ابتسم أبوها ابتسامة فخر وقال:
ـ إنتِ تربيتي يا ياسمين. اللي يقلل منك أو يحاول يكسرك، ما يستاهلش تحاربي عشانه. إحنا معاكي في أي قرار تاخديه، والصبح هنكون عند أكبر محامي عشان نجيب حقك بالقانون.
في صباح اليوم التالي…
صحي كريم على صوت جرس الباب بشكل متواصل وجنوني.
قام بلهفة، وافتكر إنها ياسمين رجعت وعقلت. جرى فتح الباب… لكن كانت إن اللي واقفين قدامه هما أمه نوال وأخته دينا، وشايلين شنط هدومهم!
دخلت نوال بزعيق:
ـ بقى بتقفل السكة في وشي يا كريم؟ وبتقول عليا أنا وأختك إننا السبب؟ إحنا جينا نقعد معاك هنا عشان نسندك ونوري الهانم إن البيت ده له أصحاب، وإننا مش هنخليها تاخد منك القشرة!
بصلهم كريم بذهول وقال:
ـ أنتوا جايين تقعدوا هنا؟ إنتوا فاهمين إيه اللي بيحصل؟ المحامي قال لي إن ياسمين لو رفعت تمكين، النيابة هتمكنها من الشقة لأنها الزوجة والحيازة لها، وهتطردني أنا وأي حد معايا!
ردت دينا ببرود وهي بتقعد على الكنبة وتفتح التلفزيون:
ـ ياعم سيبك من كلام المحامين الفاضي! هي فاكرة المحاكم بتخلص في يوم وليلة؟ قضايا التمكين بتقعد بالشهور والسنين! إحنا هنقعد هنا ونغير كوالين الباب، والجدع يفرجنا هيعمل إيه!
وقبل ما كريم يرد على دينا، التلفون رن. كان رقم غريب.
رد كريم بلهفة:
ـ أيوة؟
جاءه صوت راجل حاد وواثق:
ـ الأستاذ كريم؟ أنا الأستاذ مجدي، محامي المدام ياسمين. ببلغك رسميًا إننا قدمنا الصبح طلب عاجل لرئيس نيابة الأسرة لتمكين موكلتي من شقة الزوجية بحسبانها الحائزة الفعلية، ومعانا مستندات الملكية والتحويلات المالية. كمان رفعنا دعوى طلاق للضرر بدلايل مسجلة وموثقة، ودعوى استرداد أعيان جهاز وقيمة المؤخر والنفقة.