حماتي اتصلت بالشرطه ٢
صوت نوال شق سكون الشارع بنبرة كأنها استعادت فيها كل سموم الدنيا، نبرة مش نبرة ست مكسورة، نبرة حد لقى كارت محروق وقرر يولع بيه في كل اللي حواليه. زعقت وهي بتشاور عليا بإيد بتترعش من الغيظ:«فاكرة نفسك انتصرتي يا بت إنتِ؟! فاكرة إن الورقة اللي معاكي دي هتحميكي؟! اسألي جوزك كده مين اللي سدد آخر قسطين كبار في تمن الشقة دي عشان تاخدي العقد النهائي؟! اسأليه النص مليون جنيه اللي اتقفل بيهم الحساب جم منين؟! ده دهبي أنا وشقى عمري اللي باعه أحمد واداهولك عشان تكملي تمن الشقة اللي عاملاها ملكك لوحدك!»
وقفت مكاني مسمرة. إيدي اتجمدت على أوكرة الباب الحديد بتاعة مدخل العمارة. الهوا حواليا حسيت كأنه سخن فجأة وسحب كل الأكسجين. لفيت وشي ببطء شديد وبصيت لأحمد. كان واقف عينه في الأرض، بيحاول ينكمش، كأنه بيتمنى الأرض تنشق وتبلعه قبل ما عيني تيجي في عينه.
منى ضحكت بصوت عالي وشماتة فجّة:«أيوه يا حبيبتي! اطلعي بقى من دور الست العصامية الشريفة اللي بنية بيتها بفلوسها! ماما بايعة غوايشها وسلاسلها وادّت لأحمد ستمية وخمسين ألف جنيه كاش في إيده من سنتين لما المقاول هدده بالحجز لو مكملتوش باقي التمن! يعني ليكي عين تقفي وتطردينا وإنتِ عايشة في خير دهب أمي؟!»
بصيت لأحمد، وحسيت إن كل خلية في جسمي بتغلي، بس صوتي طلع هادي بشكل يرعب، هدوء ما قبل الانفجار التام:«أحمد… بص لي هنا. الكلام ده حقيقي؟»
أحمد رفع راسه، عينيه كانت حمرا، شفايفه بتترعش ومش عارف يجمع جملة مفيدة:«سارة… افهمي بس… الموضوع مش كده بالظبط… ده كان…»
قاطعته بصوت حاد ومسموع في الشارع كله:«النص مليون جنيه بتوع القسط الأخير اللي قولت لي إنك أخدت بيهم قرض بضمان مرتبك من البنك… جم من دهب مامتك؟!»
نوال وقفت على رجليها، نفضت عبايتها، وابتسامة انتصار مريضة اترسمت على وشها وهي شايفة الشك والذهول بيهزوا كياني:«أيوه يا ست هانم! بفلوسي ودهبي! قال لي يا ماما سارة مزنوقة والشقة هتروح وعلينا شرط جزائي، فكيت دهبي كله وجريت بيه عليه عشان أستر على ابني ومراته! ودلوقتي جاية تطرديني؟! قسماً برب العزة يا سارة لرفع قضية نـ،،صـــ،ـب وخـ،،يـــ،ــانـــ،ـة أمـ،،اـنـــ،ـة عليكي وعلى أحمد، والشقة دي مش هتقعدي فيها لوحدك دقيقة واحدة، يا نعيش فيها معززين مكرمين، يا أبيعها وأفضحكم في المحاكم وأرد دهبي اللي لهطتوه!»